Skydweller Aero prezanton dronin më të madh në botë me energji diellore – në gjendje të qëndrojë në ajër për javë të tëra
Kompania Skydweller Aero, e mbështetur nga partnerë amerikanë dhe francezë, është në fazat e avancuara të zhvillimit të një flote avionësh autonomë me energji diellore, të ndërtuar për fluturime të gjata, pa pilot dhe pa emetime ndotëse. Një prej arritjeve më të fundit të saj është prezantimi i dronit më të madh në botë në këtë kategori, me një hapje krahësh më të madhe se ajo e një Boeing 747. Fluturakja, e ndërtuar nga fibra karboni ultra të lehta dhe e pajisur me 17.000 qeliza diellore, është projektuar për të qëndruar në ajër për periudha që mund të zgjasin deri në një muaj, pa pasur nevojë për karburant apo ulje.
Gjatë testimeve të fundit të kryera në fund të vitit 2024 në aeroportin ndërkombëtar Stennis në Misisipi, mjeti ka realizuar fluturime plotësisht autonome, përfshirë një mision që zgjati 22.5 orë dhe disa të tjerë me kohëzgjatje mbi 16 orë.
Synimi i Skydweller Aero është që këta dronë të përdoren për misione të gjata, nga 30 deri në 90 ditë, për qëllime të ndryshme: mbikëqyrje të rrugëve detare dhe tokësore, zbulim të kontrabandës dhe piraterisë, vëzhgim të zonave të konfliktit si dhe ndjekje të migrimeve të kafshëve të egra. Modeli bazohet në aeroplanin solar “Solar Impulse 2”, i cili u bë i famshëm për udhëtimin rreth botës me energji diellore. Por ndryshe nga paraardhësi, teknologjia e Skydweller synon përdorim të gjerë komercial, ushtarak dhe humanitar.